X
გამოიწერეთ ჩვენი გვერდი
გთხოვთ მოიწონეთ ჩვენი გვერდი
ფერების ფსიქოლოგია
ფერთა სიმბოლიკას დიდი ხნის ისტორია აქვს. "ფერის წაკითხვას" ადამიანები დიდ მნიშვნელობას ანიჭებდნენ, რამაც ასახვა პოვა მითოლოგიაში, ზღაპრებში, თქმულებებში, სხვადასხვა რელიგიურ თუ მისტიკურ სწავლებაში. ასტროლოგიაში ცისარტყელას 7 ფერს 7 ძირითადი პლანეტა შეესაბამება: წითელი მარსის ფერია, ლურჯი - ვენერასი, ყვითელი - მერკურისა, მწვანე - სატურნისა, ალისფერი - იუპიტერისა, ნარინჯისფერი - მზისა, იისფერი კი მთვარისა.
ფერი ადამიანის ფსიქოლოგიურ მდგომარეობასაც გამოხატავს. პრაქტიკული ფსიქოლოგიის ცენტრის ინფორმაციით, ფერების ფსიქოლოგიური დახასიათება ასეთია:
წითელი სისხლსა და ცეცხლთან ასოცირდება. მისი სიმბოლური მნიშვნელობა მრავალმხრივია და ხშირად ურთიერთგამომრიცხავიც. ეს ფერი მიანიშნებს სიხარულზე, სიყვარულზე, სილამაზეზე, თუმცა, მეორე მხრივ, გამოხატავს მტრობას, შურსა და ომსაც. წითელი ძირითადი ჰერალდიკური ფერია. ის რევოლუციის, ბრძოლის სიმბოლოა, ასევე ძალაუფლებასა და დიდებასაც ნიშნავს.
რაც შეეხება ფსიქოლოგიურ დატვირთვას, წითელი ვნების ფერია. იგი უძველესი დროიდანვე მოიაზრება აგრესიულობისა და სექსუალობის სიმბოლოდ. ადამიანი, რომელსაც წითელი უყვარს, თამამი, ნებისყოფიანი, ძლიერი და კონტაქტურია. ამასთანავე, ალტრუისტიც. მას კი, ვისაც ეს ფერი აღიზიანებს, არასრულფასოვნების კომპლექსი აქვს, გაურბის კონფლიქტურ სიტუაციებს, უყვარს განმარტოება და სტაბილური ურთიერთობები.
წითელი ფერი ენერგიულობის გამომხატველია. მისი უარყოფა ორგანულ სისუსტეზე, ემოციურ და ფსიქოლოგიურ გამოფიტვაზე მოუთითებს.
თეთრი სისუფთავის, სიწმინდის, უმწიკვლობისა და სიხარულის სიმბოლოა. ჯერ კიდევ ანტიკურ ეპოქაში ის მიწიერებას მოწყვეტილ, სულიერ უბრალოებას აღნიშნავდა. თეთრს შესაძლოა საპირისპირო მნიშვნელობაც ჰქონდეს. თავისი ბუნებით ის თითქოს შთანთქავს და ანეიტრალებს სხვა ფერებს და სიცარიელის, სიჩუმისა და, საბოლოო ჯამში, სიკვდილის სიმბოლოდაც იქცევა. თეთრი სხვა ფერების სინთეზია, ამიტომ მას იდეალურ ფერად მოიხსენიებენ. ეს ფერი შესაძლოა აირჩიოს ნებისმიერი ხასიათის ადამიანმა, რომელიც ხელს არავის ჰკრავს.
შავი უბედურების, გლოვის, სიკვდილის ფერია. ძველ მექსიკაში მსხვერპლშეწირვის რიტუალის დროს ზვარაკს სახე და ხელები შავად ჰქონდა შეღებილი. შავი თვალები დღემდე ავის მომასწავებლად მიიჩნევა. არსებობს კავშირი შავ ფერსა და სექსუალურ მიმზიდველობას შორის.
რაც შეეხება ფსიქოლოგიურ დატვირთვას, ეს ფერი დაბალი თვითშეფასების და ცხოვრებისადმი პესიმისტური დამოკიდებულების სიმბოლოა. მაგალითად, ადამიანები, რომელთაც შავად შემოსვა უყვართ, ცხოვრებას ხშირად მუქ ფერებში აღიქვამენ, მიდრეკილნი არიან დეპრეესიისკენ - ეჭვი არ ეპარებათ, რომ მათი იდეალები განუხორციელებელი დარჩება. ბავშვები, რომლებსაც სიყვარული და სითბო აკლიათ, ხატვისას ხშირად იყენებენ შავ კონტურებს. ნორმის ფარგლებში შავი ფერი, როგორც წესი, უარყოფილია.
ყვითელი ოქროს ფერია. ის უძველესი დროიდან აღიქმება მზის, შემოდგომის, მწიფე თავთავების, ხმელი ფოთლების ფერად, თუმცა იმავდროულად ავადმყოფობასთან, სიკვდილთან, საიქიოსთანაც ასოცირდება. აზიის ზოგიერთ ქვეყანაში ყვითელი დარდისა და გლოვის სიმბოლოა.
ფსიქოლოგიური თვალსაზრისით, ყვითელი სიმშვიდეს, ძალდაუტანებელ ურთიერთობებს, ინტელიგენტობას აღნიშნავს. ვისაც ეს ფერი უყვარს, კონტაქტური, ცნობისმოყვარე, თამამი პიროვნებაა, ადვილად ახერხებს სხვათა კეთილგანწყობის მოპოვებას. ვისთვისაც ეს ფერი უსიამოვნოა, პესიმისტია, მასთან ურთიერთობა ძნელია. ყვითელი ენერგეტიზმის ფერია.
ლურჯი ზოგიერთი ხალხისთვის ცისა და მარადისობის სიმბოლოა. შესაძლოა აღნიშნავდეს სიკეთეს, ერთგულებას, ურთიერთობის სიმტკიცესაც, ჰერალდიკაში კი - სიბრძნეს, სიმართლეს, კარგ სახელსა და ერთგულებას. ვისთვისაც ლურჯი საყვარელი ფერია, მოკრძალებული და მელანქოლიური პიროვნებაა. ასეთი ადამიანი მალე იღლება და ხშირად სჭირდება დასვენება. ლურჯის მიუღებლობა ახასიათებთ მათ, ვისაც თავის ყოვლისშემძლედ წარმოჩენა უყვართ, სინამდვილეში კი საკუთარ თავში ჩაკეტილი, საკუთარი ძალის რწმენას მოკლებული ადამიანები არიან.
ავადმყოფობისა და გადაღლილობის დროს ლურჯ ფერზე მოთხოვნა იზრდება.
მწვანე ბალახისა და ფოთლების ფერია. სხვადასხვა ხალხისთვის ის ახალგაზრდობის, იმედისა და მხიარულების სიმბოლოა, თუმცა ხანდახან მოუმწიფებლობისა და არასრულყოფილების აღმნიშვნელიცაა.
მწვანე ფერი ზედმიწევნით მატერიალურია და ამშვიდებს, თუმცა ზოგჯერ დამთრგუნველიცაა. პიროვნება, რომელიც მწვანეს ამჯობინებს, სხვისი გავლენის ქვეშ ყოფნას გაურბის, თვითდამკვიდრებას ცდილობს და ეს მისთვის სასიცოცხლოდ მნიშვნელოვანია, ხოლო მას, ვისთვისაც ეს ფერი მიუღებელია, სირთულეებზე თვალის დახუჭვა სჩვევია.
მწვანე მოიცავს ფარულ არარეალიზებულ ენერგიას, რომელსაც ნებისყოფის ჩართვა და მობილიზება სჭირდება, ამიტომ მწვანე ფერის მოყვარული ადამიანები გამუდმებით საკუთარ თავში დარწმუნებას ცდილობენ.
ადამიანის ფსიქოლოგიურ მდგომარეობაზე ინფორმაციას სხვა ფერებიც გვაწვდის. მაგალითად, ნარინჯისფერი მეოცნებე და კარგი ინტუიციის მქონე ადამიანების ფერია. ჰერალდიკაში ის პირფერობასა და ცინიზმსაც აღნიშნავს. ვარდისფერი სიცოცხლის ფერია. ვინც მას ამჯობინებს, უმნიშვნელო მიზეზიც კი ანერვიულებს და აღიზიანებს. პრაგმატული ადამიანებისთვის კი ვარდისფერი მიუღებელია. იისფერი ინფანტილიზმის, თანადგომისა და დახმარების მოთხოვნილების სიმბოლოა. ამ მხრივ იისფერის მიღება-უარყოფა ფსიქიკური და სქესობრივი სიმწიფის თავისებური ინდიკატორია.
